Со правилна исхрана до подобар сон

Не прескокнувајте оброци, за потоа да се прејадете

Прескокнувањето оброци на прв поглед можеби Ви се чини како најлесниот начин за скусување калории од вкупниот дневен внес и следствено на тоа – намалување на телесната тежина. Но, обично на крајот од денот се случува добро да се најадете и да надоместите за прескокнатото. Од една страна нередовните оброци можат да предизвикаат нарушување на хормоналната рамнотежа, а од друга, доцните обилни оброци го влошуваат проблемот преку стимулација на организмот, наместо негово смирување пред спиење.

Јадете рано и јадете често

Телото ја искористува енергијата во текот на спиењето, па штом ќе се разбудите Ви е потребна нова енергија. Никогаш не го прескокнувајте појдаокот и секогаш трудете се да имате храна богата со протеини, за енергијата од оброкот да трае подолго. Дополнително, внесувањето помали количини храна на секои 2 до 3 часа го одржува нивото на хормони и невротрансмитери на правилното ниво, што на крајот од денот ќе Ви помогне полесно да заспиете.

Не правете екстремни пресврти

Кога вкупниот дневен внес на калории паѓа под 1.200, во телото се јавува недостиг од клучните хранливи материи, што може да има силно влијание врз квалитетот на спиењето. На пример, може да дојде до грчење на мускулите во текот на ноќта или при посериозен недостиг на фолна киселина и до појава на несоница. Исто така, анорексичните луѓе кои имаат исхрана со исклучително мала енергетска вредност минуваат многу покусо време во фазата од сонот која е клучна за поправка и опоравување на мускулите.

Направете баланс

Направете баланс во исхраната, внимателно одбирајќи храна богата со: витамини од Б-комплексот, калциум и цинк. Калциум и цинк се природни релаксанти, додека витаминот Б6 му дава сигнал на организмот да започне со излачување на хормонот за смирување, серотонин.